A pasada semana adxudicábanse os traballos de rehabilitación de dúas naves das Lonxas de Raxoi para albergar as instalacións provisionais ás que se trasladarían os comerciantes do Mercado Municipal unha vez comezadas as obras de rehabilitación do edificio da Praza do Conde.
A día de hoxe, cando están a piques de cumprirse tres anos dende a presentación do anteproxecto do novo Mercado, o noso Concello non conta con os fondos necesarios para facer realidade o documento redactado pola empresa MERCASA, presupostado en 2,5 millóns de euros.
Nos últimos meses dende o Goberno Local insistiuse na idea de que unha vez rematadas as obras nas Lonxas de Raxoi procederíase ao traslado dos praceiros a estas instalacións provisionais; o que dada a ausencia de fondos para a rehabilitación do edificio principal está a xerar un clima de preocupación e temor entre os comerciantes, compartido por unha gran parte da veciñanza así coma polos partidos da oposición, ao non serlles garantida de forma oficial dende o Concello unha data de regreso. Tendo en conta o exposto anteriormente, podería darse o paradoxo de que ante a ausencia dos citados fondos, a que en principio está contemplada coma unha ubicación provisional rematase por ser definitiva.
Cabe recordar que tal e como o seu nome indica as “instalacións provisionais” están pensadas para ser ocupadas por un espazo curto de tempo, xa que as súas características, tamaño dos posto, capacidade das cámaras frigoríficas… non permiten realizar o traballo de algúns dos comerciantes ao 100% ou polo menos nas mesmas condicións que no actual mercado.
Deixando a un lado a nosa opinión sobre a actitude e a “xestión” realizada polo Goberno Local dende o inicio deste proceso, tendo en conta a importancia deste tema e coa única intención de buscar unha saída que contente a tódalas partes implicadas o Grupo Municipal do PSdeG-PSOE, a través do seu Voceiro propón ó Pleno do Concello de Pontedeume a aprobación do
seguinte acordo:
1º.- O Concello de Pontedeume comprometerase por escrito con os comerciantes do Mercado Municipal a non facer efectivo o seu traslado ás instalacións provisionais en tanto non se consigan os fondos necesarios para a rehabilitación do edificio da Praza do Conde. Así mesmo, deberá garantir no citado documento o regreso dos praceiros ao seu antigo emprazamento unha vez rematadas as obras de rehabilitación do citado edificio
