Rogos que levamos ao Pleno Ordinario de Marzo

1º.- Dende hai tres semanas está depositada unha bolsa de lixo de considerables dimensións diante do nº 45 da Rúa Ferreiros, esquina Praza das Angustias. Pregamos a súa retirada e que se investigue quen é o responsable do depósito.

2º.- Pregamos o arranxo e coidado da parte alta do Parque Sarmiento, cortando a herba, plantando flores nos macizos e colocando mais bancos, recomendando que sexan do mesmo modelo que os da Alameda, dos que se acaban de poñer dous na beirarrúa da Avenida da Coruña, ós que lles auguramos o mesmo éxito que os colocados no outro lado que serven de tope para os vehículos estacionados.

3º.- Diante do lamentable estado que presenta o firme da rúa entre o Souto da Vila e o Barro, principalmente na súa parte alta ata a súa conexión coa estrada nacional, pregamos se proceda ó seu arranxo e rebacheo.

4º.- Pregamos o arranxo do panel informativo situado a carón da gasolinera.

5º.- Ante a mala imaxe que representa pregamos a recollida duns enseres depositados na Rúa do Picho dende hai semanas.

6º.- Ante as queixas que nos fixeron chegar veciños da zona, pregamos a recollida do lixo en Cabría Vella, levan 15 días en este servizo.

7º.- Ante o mal estado no que se atopa, pregamos a substitución do colector situado no “Lugar do Monte” na parroquia de Andrade. Así mesmo interesamos se proceda á retirada de varios neumáticos que levan na zona máis dun ano.

8º.- Pregamos a retirada da terra que se atopa no camiño que una “A Brea con A Pía”, na parroquia de Andrade.

9º.- Pregamos o arranxo dunha farola no “Lugar do Monte”.

10.- Ante a invasión da maleza, pregamos o rozado do tramo que discorre entre o “Camiño Vello e a Rectoral” na parroquia de Vilar.

11º.- Pregamos novamente a substitución da marquesina no lugar da “Choza-A Regueira” en Andrade.

12º.- Pregamos a limpeza e reposición das baldosas rotas nas inmediacións do Centro de Saúde.

13º.- Pregamos o rebacheo do Camiño de “Loureiros ao Covés” na parroquia de Andrade.

14º.- En cumprimento da lexislación vixente no que a accesibilidade se refire, pregamos a instalación dunhas varandas nas escaleiras que comunican a Rúa Galera cos Almacéns de Raxoi.

Preguntas que levamos ao Pleno Ordinario de Marzo

1ª.- Por que razóns as axudas municipais seguen sen chegar aos seus beneficiarios?

2ª.- Dende 1971 vense celebrando o 21 de marzo o Día Forestal Mundial, máis coñecido como Día da Árbore , este ano non nos consta que se fixera ningún acto organizado dende o Concello, ben pola Concellería de Medio Ambiente, ben dende Cultura. Por que razón, sendo este ano ademais como lles lembrabamos o pasado Pleno o Ano dos Bosques? Pénsase trasladar a outra data? Xa teñen concretada a Planificación para este ano por mor desta conmemoración?

3ª.- Hai algunha novidade con respecto aos CELGA?

4ª.- Na última Asemblea Xeral Ordinaria do Ateneo Eumés Fernán Martís interesábanse polo posible uso dos taboleiros publicitarios municipais. É posible que esta asociación eumesa, como outras culturais ou deportivas poidan anunciar os seus actos nos citados taboleiros? Que canles deberán seguir?

5ª.- Para cando está prevista a prohibición de estacionamento na Alameda e o inicio das obras de reparación desta zona verde?

6ª.- No mes de Xaneiro os veciños de Vista Alegre denunciaban a instalación dun repetidor de “sinal wifi” a carón das súas vivendas. Contou esta obra con a pertinente licencia municipal?, de non ser así, que mediadas se tomaron dende o Goberno Municipal ao respecto?

7ª.- Xa hai tempo que o s veciños de Os Castros, Valdeviñatos e A Pía na parroquia de Andrade veñen denunciando “baixadas” na tensión eléctrica, situación que achacan á insuficiencia de potencia do transformador situado nesa zona . Fíxose algunha xestión ao respecto?

8ª.- O pasado 29 de outubro de 2010 unha sentenza dictada polo Tribunal Superior de Galicia anulou a Oferta de Emprego presentada polo Concello de Pontedeume. Somos coñecedores de que dende ese momento leváronse a cabo varias reunións entre Grupo de Goberno e os representantes dos empregados municipais. Poden informar do resultado de ditas reunións?, en que punto se atopan as negociacións?

9.- Teñen pensado presentar o proxecto de Presupostos de 2011, como recentemente declarou o Sr. Alcalde á prensa, ou rematará a lexislatura co de 2009 reiteradamente prorrogado?

Vertedoiro incontrolado a escasos 20 metros da ermida de Breamo

Os socialistas de Pontedeume queremos denunciar a lamentable situación que estase a dar nas inmediacións da ermida de San Miguel de Breamo, a cal día tras días está amencendo cada vez máis repleta de escombro, residuos e enseres de todo tipo, converténdose nun vertedoiro ilegal.

Tendo en conta a distancia existente entre o núcleo urbano e as inmediacións da ermida, xunto coas poucas visitas que normalmente recibe o monumento durante o período invernal, temos que supoñer que a persoa ou persoas que actuaron deste modo tan incívico e lamentable, aproveitáronse desta falta de tránsito de vehículos e de visitantes para actuar de dito modo, arroxando nas inmediacións todo tipo de obxectos nocivos para o entorno, e que deben de ser depositados por lei no correspondente punto limpo do Concello.

É por isto que instamos ao goberno local, a poñerse en contacto coas autoridades pertinentes para que leven a cabo un investigación que poida esclarecer que persoa ou persoas son as responsables deste acto incívico e se proceda a aplicar a conseguinte sanción. Así mesmo rogamos a limpeza do entorno e o acondiciononamento dos arredores da ermida, posto que ditos residuos atópanse a menos de vinte metros da ermida, ocasionando un enorme impacto ambiental e tamén visual.

Consideramos este feito intolerable, xa que representa unha profunda falta de respecto hacía o resto dos cidadáns, así coma un atentado ao medio ambiente e ao patrimonio da nosa vila.

Boletín Especial: Resumo da lexislatura

Nos seguintes enlaces podedes ver o novo boletín da Agrupación Socialista de Pontedeume:

- Portada e Contraportada

- Interior

O PSdeG-PSOE presentará unha iniciativa parlamentaria instando á Xunta a mediar entre a dirección de EINSA e os representantes dos traballadores

Hoxe, venres día 26, a parlamentaria do Grupo Socialista, Beatriz Sestayo, acompañada polo Voceiro Municipal do PSdeG-PSOE, Bernardo Fernández, mantiveron un encontro con representantes do Comité de Empresa de EINSA para interesarse polo punto no que se atopa o conflicto laboral que afecta a esta industria así como para trasladarlles o apoio do Grupo Socialista aos traballadores.

Nesta reunión os membros do Comité de Empresa fixeron constar aos representantes do PSdeG-PSOE a súa preocupación pola grave situación na que se atopa a empresa, que procedeu ao despido de 23 traballadores hai poucas datas, e polo futuro laboral dos case 400 empregados que a compañía ten nas instalacións de Pontedeume e As Pontes.

Ante unha situación que afecta tan gravemente á economía de moitas familias eumesas e tendo en conta a ausencia de novas iniciativas por parte do Goberno Local, dende o PSdeG-PSOE adquirimos o compromiso de presentar a semana próxima unha iniciativa parlamentaria instando á Xunta de Galicia, e máis concretamente á Consellería de Industria, a mediar no conflicto para a consecución dunha solución que teña en conta as xustas reivindicacións dos traballadores.

Membros da xunta directiva da Unidade Veciñal Olmo acompañados polo voceiro de Grupo Municipal Socialista, Bernardo Fernández, trasladáronlle aos responsables da Demarcación de Estradas do Estado en Galicia a necesidade de mellorar os accesos á urbanización

El ramal de color azul se corresponde con el actual acceso, el de color amarillo sería la solución que se nos propuso hoy.

Hoxe venres 18 de marzo, representantes da Unidade Veciñal Olmo, encabezados polo seu presidente, José Salceda, e acompañados polo Voceiro Municipal do PSdeG-PSOE, Bernardo Fernández, mantiveron unha reunión na Demarcación de Estradas do Estado en Galicia con responsables do organismo dependente do Ministerio de Fomento para trasladarlles a necesidade de mellorar os accesos á urbanización eumesa.

Neste encontro foron informados da imposibilidade de construír nas inmediacións a rotonda proposta nos últimos días dende a asociación veciñal, situación que ven dada por un problema de cotas, así coma a forte pendente da estrada nacional ao seu paso pola zona.

Tal e como se pode comprobar na imaxe adxunta, como alternativa propúxose a construcción dun novo “vial” que partindo paralelamente da N-VI, conecte a mesma con a urbanización, mellorando considerablemente o acceso, e a fin de garantir unha maior seguridade, evite que aqueles vehículos que se dirixan a este núcleo se vexan obrigados a frear en plena estrada. Así mesmo, trasladóusenos a boa disposición da administración estatal de autorizar ao Concello, de quen depende a obra por tratarse dunha rúa municipal, a levar a cabo dita actuación, facendo uso, se fose necesario, da zona expropiada propiedade do Ministerio.

Tendo en conta que a solución a este problema depende do Goberno Local, esperamos e desexamos que o Sr. Alcalde leve a cabo as xestións necesarias para facer realidade este proxecto, mostrando máis interese por esta cuestión que o amosado hai xa dous anos, cando despois dunha reunión similar á mantida hoxe, membros do noso Grupo e da anterior directiva trasladáronlle unha solución similar.

Dificultades no pago das Axudas Municipais en Pontedeume

Ante as queixas que nos transmiten veciños e asociacións pola falla do cobro das axudas do pasado ano, xa debidamente xustificadas ante o Concello, queremos denunciar a continua  perda de apoio institucional no eido social e cultural que estamos a sufrir en Pontedeume dende que goberna o Partido Popular.

Asociacións Culturais, ANPAS, Asociación de Amas de Casa, …seguen á espera das axudas que lle permitan organizar actividades que enriquecen o día a día da nosa vila.

Na mesma tesitura atópase a xuventude eumesa que fai teatro no grupo do IES “Breamo”, esquecida por un erro do Concello, no presuposto do 2009. Ao resignarse o membros do Grupo de Goberno a funcionar o 2010 e o 2011 con este documento prorrogado, levan dous anos sen ningún tipo de apoio económico  municipal, a pesares do cal, nun auténtico exemplo de compromiso con a nosa vila, seguen colaborando na programación cultural do Concello, mais o Sr Alcalde non atopa xeito de colaborar con “Arjé”.

A esta situación hai que engadir o retraso no pagamento das axudas para material escolar, especialmente grave se temos en conta que este ano se reduciu a partida destinada para tal fin ás familias con menos recursos económicos da vila. Hai pais e nais que teñen pendentes dende comezo de curso contas nas librarías e seguen esperando a que a Concellería de Educación faga efectivas as axudas xa aprobadas pero non cobradas.

Tendo en conta isto, non podemos compartir a alegría manifestada na prensa polo Sr. Crespo ante a “axilidade” na xestión: As axudas do ano pasado en Pontedeume non chegan mentres en outros concellos están a aprobar as do curso que ven!

O tratamento actual destas subvencións demora e  dificulta a vida social e cultural eumesa e contrasta con a situación de privilexio de “certas empresas”, que  cobran relixiosamente todos os meses a pesares dos reparos emitidos pola intervención municipal. Dende o PSOE eumés, ademais de cuestionar a cada vez máis lenta e nefasta xestión do actual  goberno, apostamos por unha unha xestión rápida e eficaz que contribúa ao desenvolvemento das programacións das asociacións e con el, da  sempre rica e variada oferta deportiva, educativa e cultural á que estabamos afeitos

Sobre a rehabilitación do Mercado Municipal

Interesabámonos no último Pleno polas xestións que se están levando a cabo dende o Grupo de Goberno para a rehabilitación do Mercado Municipal, cuestión que vimos repetindo mes tras mes obtendo sempre a mesma resposta por parte dos representantes do Partido Popular: “non hai novidades”.

Hai máis de ano e medio que se presentaba publicamente o anteproxecto do novo Mercado. Dende ese mesmo instante o noso Grupo interpelou ao Goberno con distintas preguntas relacionadas con ese tema. A meirande parte delas referíanse ás xestións levadas a cabo para a consecución dos máis de dous millóns de euros necesarios para acometer a reforma así coma aos trámites realizados con a Consellería de medio Rural para a adquisición e posterior derrubo do “edificio da Agraria”, xa que no documento presentado contémplase a desaparición dese inmoble e a utilización do solar como estacionamento para a carga e descarga.

Cando están a piques de comezar os traballos de rehabilitación de dúas naves das Lonxas de Raxoi para albergar o mercado provisional, “dase a paradoxa” de que o Goberno Municipal non dispón de fondos para acometer a obra das instalacións principais, situación que escapa a toda lóxica xa que necesidade de contar con unha ubicación temporal que albergue aos “praceiros” ven dada pola actuación que se tería que levar a cabo no edificio principal.

Tendo en conta o exposto, preguntámonos que é o que se estivo facendo ata o de agora dende o Grupo de Goberno?, toda vez que o Sr. Alcalde nunhas declaracións á prensa realizadas o día 13 de agosto de 2009, informaba do bo transcurso da reunións mantidas de cara a obter o financiamento deste proxecto.

Estamos unha vez máis ante un Goberno caracterizado pola inoperancia e a total ausencia de iniciativa, quen nun novo exemplo de desorganización, comeza “a casa polo tellado”. Desexamos que a ausencia de fondos resultado da actitude anteriormente mencionada, non supoña para os comerciantes do Mercado Municipal unha estancia “indefinida” nas Lonxas de Raxoi.