Comentarios ao Pleno de xaneiro 2011

Outro Pleno máis sen que o Goberno Municipal achegue ningunha proposta. Nin Presuposto, nin xestión con outras administracións, nin melloras locais, nin nada. O Sr Alcalde debe estar durmindo, será o “edredoning” o novo estilo dos dirixentes populares? O grave no noso caso é que a diferenza de Rajoy a Torrente pagámoslle para gobernar.

Estas son as respostas ás nosas preguntas no Pleno:

Á primeira pregunta sobre as datas dos próximos cursiños de Formación, non deron nin a 1ª, pois nada teñen en concreto programado. A que estarán esperando…?

Para a Sra. Carballeira o balance das actividades do Nadal foi positivo. Ben se ve que cando estaban cheas de nenos e nenas os Sr. Do Goberno nin sequera tiñan curiosidade social.

Foron unhas actividades en xeral con escasa participación, algunhas chegaron a suspenderse e o Planet que dixo que ía continuar os 5 días de “Ponte en marcha”, pois …Non está en marcha.Pero, en breve, dixo a Concelleira, claro que antes dixera que en decembro. Será para febreiro? Esperamos, pois a oferta para a mocidade na fin de semana en Pontedeume, xa nin é.

Asistiuse as mesmas reunións que en anos anteriores, pero o Sr Otero nada puido informar sobre esta nova perda, pois descoñece o que alí se falou.Que interese tan grande! De todos os xeitos o resultado é que Pontedeume non ten “Noitebus” para a súa mocidade. Nin nada ofertan, nin nada xestionan.

Na 5ª pregunta, (aclaramos que estas preguntas seguímolas entregando por escrito e con anterioridade ao Pleno) o Sr Voceiro dixo descoñecelo que terá que mirar a licencia nos arquivos. Pois é Concelleiro de Urbanismo, ou ten centos de casas sen Licencia de 1ª ocupación? Pois que se informe e informe, e que sexa máis pronto que tarde!

Esta deficiencia do saneamento en Ricardo Sánchez dixo o Sr. Concelleiro de Obras que xa está solucionada.

Na 7ª pregunta a resposta foi, a estas alturas, xa nada sorprendente, será un problema administrativo, pois eles nada saben. O de sempre se non vale o retrovisor valen os empregados.

E por suposto o colofón: Non presentaron aínda os presupostos por baixas dos técnicos… Faltaría máis, coa grande celeridade e eficacia que caracteriza a xestión do Goberno Municipal!

Ningún curso no Centro de Formación eumés

Ante a 1ª pregunta que presentabamos ao Pleno Ordinario de Xaneiro : “Que actividades de formación teñen programadas, e en que datas se celebrarán?” A resposta do Voceiro do Goberno Municipal, que é ademais Concelleiro responsable de Formación e Emprego, foi clara e concisa: Nada teñen planificado, pedirán os cursos FIP, pero nin sequera saben cales.

Dende o noso grupo levamos loitando pola formación en Atención á Dependencia toda a lexislatura, para que as eumesas e eumesas se formen e podan ocupar os postos de traballo que se están a crear ao amparo deste novo servizo público, previndo tamén a demanda que haberá ante a próxima apertura no noso Concello dun Centro de Día.

A Conselleira de Traballo e Benestar Social Sra. Mato ven, ademais, de anunciar que comezarán a finais de febreiro cursos de 3 e 6 meses que chegarán a arredor de 23000 parados de toda Galicia, polo que coidamos que o noso Concello solicitaría algún deles: de Turismo, Dependencia, ou mesmo para o Sector Agrario ou de Enerxías Renovables…Pero non, non os solicitaron, nin así funciona o Centro de Formación e Emprego de Pontedeume,

Outra area de formación que reclamabamos en Plenos anteriores é a do Idioma, que onte lembramos ao Sr. Otero pois están a negociar a Oferta Pública de Emprego, esta vez parece que de xeito regulamentario, logo de que os obrigaran por vía xudicial. Os cursos CELGA que capacitan no uso do Galego e ademais son meritorios á hora de presentarse a unha oposición non se van a celebrar na nosa vila. Xa non quixeron acceder á convocatoria de setembro e agora tampouco. Está o prazo de reserva aberto para os novos cursos en concellos veciños, a xente que precise destoutra formación tamén terá que desprazarse fora de Pontedeume.

Ou ben o desinterese do Goberno Eumés en materia de Formación é total ou ben o Sr Otero non está capacitado para a responsabilidade nesta materia. Calquera das dúas opcións e nefasta para o presente e o futuro de Pontedeume que logo de ser dos primeiros concellos con centro de FOREMDES ve como este está baleiro de contido e a veciñanza vese obrigada a saír de Pontedeume se quere acceder ou mellorar no mundo laboral

Outro recorte máis de servizos municipais feito polo goberno popular eumés.Estamos sen Formación, sen ISM, sen CEFORES, sen 2 escolas, sen Campamentos Municipais,sen Oferta de Emprego Público,sen PEXOM,sen Presuposto, sen…Tendo o Concello en recesión é como o Sr. Torrente quere atraer poboación e chegar a 10000 habitantes?

Dende o Grupo Socialista esixímoslle ao Sr. Alcalde que se deixe de “Brindis ao sol” e que se responsabilice de todas as areas do seu goberno. Non están os tempos para que se deite, non achegue propostas ao Pleno, bote balóns fora, e de todo teñan culpa os técnicos ou ben, o goberno anterior…E mentres tanto Pontedeume esmorece.

Preguntas que levamos ao Pleno Ordinario de Xaneiro de 2011

1ª.- Que actividades de formación teñen programadas, e en que datas se celebrarán?.

2ª.- Con que tipo de contratación se está a cubrir a garda e custodia do CEIP de Andrade?.

3ª.- Fíxose balance das actividades para a infancia e xuventude deste Nadal? Que sucede co “Planet”?.

4ª.- Realizouse alguna xestión dende o Concello para que o “Noitebús” preste o seu servizo na nosa comarca?.

5ª.- Cal é a razón pola que o edificio “Riberas do Eume”, no tramo final da Rúa Valeriano Villanueva, non conte a día de hoxe coa licencia de primeira ocupación?.

6ª.- Fomos informados polos veciños do número 24 da Avenida Ricardo Sánchez, de anomalías na obra do saneamento desta zona. Concretamente referianse ó feito de que o seu edificio non fose conectado á nova rede que se está a instalar e a que a cota da nova tubería quedaba mais alta que a da acometida do edificio, o que sen lugar a dúbidas seguiría producindo inundacións neste inmoble. Que se fixo dende o goberno local para arranxar esta deficiencia e que medidas pensan tomar ó respecto?.

7ª.- Cal é o motivo de que a día de hoxe sega sen executarse o establecido en sentenza firme en relación ás “axudas sociais” recollidas no artigo 69 do convenio colectivo deste Concello?.

8ª.- Cando pensan presentar ós grupos municipais o Orzamento do ano 2011?.

Orzamentos Municipais 2011 ??

Cando xa vai andado o mes de Xaneiro, o goberno municipal segue sen presentar o proxecto de Orzamento para este exercicio, polo que a día de hoxe a vida económica do Concello de Pontedeume estase a rexer polo Orzamento do ano 2009, respecto ó cual a Intervención Municipal ven de recoñecer nun informe importantes eivas xa denunciadas polo noso grupo, como foi a desorbitada previsión do capítulo de ingresos, que se veu finalmente reducida case á metade, obrigando a un recorte do gasto de perto dun millón de euros, coa conseguinte perda de inversión e servizos para todos os eumeses.

Estas mesmas eivas presentaban os Orzamentos de 2010, polo que foron rexeitados ó non ser apoiados por ningún grupo municipal, salvo o PP, e sen que o goberno voltase a presentar ou intentar negociar outro documento económico, desoíndo as reiteradas peticións formuladas en tal sentido polo noso grupo e optando por gobernar co presuposto prorrogado do 2009, maniobra que, temerariamente, parecen querer repetir para o presente exercicio de 2011.

Dende o grupo municipal socialista pedimoslle ó goberno municipal que exerza a súa responsabilidade e presente xa un presuposto para o ano 2011 con cifras de ingresos creíbles, axustadas ás previsións reais de recaudación, e, polo mesmo, non infladas, que nos expliquen en que políticas de gasto van a concretar a austeridade tan necesaria e reclamada ás administración públicas, e que nos indiquen que programas de gasto van a priorizar e cales van a recortar ou suprimir.

Coa responsabilidade que nos corresponde como primeiro grupo da oposición, facemos un chamamento ó goberno municipal do PP para que asuma as súas obrigas, pois corren malos tempos para deixar á improvisación, ó capricho e á arbitrariedade a xestión dos escasos recursos públicos de todos os eumeses, máxime nun ano electoral no que o novo goberno local saído das urnas podería ver seriamente afectada a súa xestión pola inactividade e incompetencia en materia económica de que ven facendo gala o actual goberno eumés.

Os veciños da Av. Ricardo Sánchez e da Praza do Mestre Álvaro Vázquez Penedo achegáronos a súas queixas ante a situación na que se atopa a zona a causa das obras de instalación do saneamento.

Non é a primeira vez que dende o Grupo Municipal Socialista denunciamos a ausencia do requirido seguimento e supervisión das obras promovidas polo noso Concello, actitude que acrecenta as xa inevitables molestias que este tipo de actuacións causan aos veciños.

Este é o caso das obras de instalación do saneamento na Av. de Ricardo Sánchez. Os residentes na zona quéixanse do “pobre acabado” desta actuación nos lugares nos que xa remataron os traballos, con numerosos socavóns, sumidoiros tupidos e infinidade de gabias cruzando a calzada así coma a presenza de terra na estrada que os días de choiva remata por converterse en lama, representando un perigo para a seguridade viaria. Como exemplo sirva nomear a Praza Mestre Álvaro Vázquez Penedo ou as inmediacións do Centro de Saúde, onde a irregularidade do firme nunha das marxes á altura do Edificio Tenreiro fai que transitar pola zona supoña todo un “test de resistencia” para os “amortiguadores” dos vehículos o que orixina que os condutores invadan o carril contrario a fin de evitarlle a os seus automóbiles esa “dura proba”, xerando novamente situacións de perigo.

Por si fose pouco, a todo o descrito temos que engadir o dispendio e ausencia de previsión do Goberno Muncipal, que días antes de que comecen os traballos envía á zona a un operario para pintar as prazas de aparcamento sobre un firme que será levantado esa mesma semana.

Á vista do sucedido queda clara unha vez máis a pésima xestión do Goberno de Gabriel Torrente, incapaz de cumprir con as súas obrigas coma promotores das obras.

Denunciamos a ausencia de limpeza e mantemento nas inmediacións do Centro de Saúde.

Denunciamos numerosas veces ao longo desta lexislatura o mal funcionamento do servizo de limpeza así coma a falla de mantemento dos edificios de titularidade municipal. Nesta ocasión estámonos a referir ao Centro de Saúde, cuios accesos atópanse cubertos “de musgo e verdín” e os sumidoiros tupidos, o que impide a correcta drenaxe das augas e aumenta o perigo de esvaramento.

Similar é a situación do solar adxacente, propiedade do Concello, cuio total abandono fai que a maleza comece a invadir o aparcadoiro, facendo máis sombrías zonas xa por si escuras e húmidas.  A isto hai que engadir a acumulación de lixo nas inmediacións así coma o mal estado no que se atopan algúns elementos do mobiliario urbano, o que produce unha sensación de desidia, impropia dunhas instalacións sanitarias. Estas circunstancias constatan unha vez máis e sen ningún lugar a dúbidas o desinterese do Goberno Local por este e outros edificios municipais.