Comentarios despois do Pleno Ordinario de Novembro

Vimos de celebrar un Pleno máis crispado do acostumado. Esperemos que todos e todas saibamos reflexionar e facer do diálogo e da argumentación as ferramentas da nosa labor política e que a tensión non nos leve a insultos e atropelos democráticos.

Nos puntos da orde do día aprobáronse o Recoñecemento Extraxudicial de Crédito e o Plan Provincial de Cooperación ás Obras e Servicios de Competencia Municipal da Deputación (POS): A aprobación foi por unanimidade ao ser por 1º vez nesta lexislatura froito do consenso. Destacar unha vez máis o compromiso orzamentario tanto da Administración Provincial como da Estatal mentres seguimos esperando pola implicación da actual Xunta de Galicia en Pontedeume.

A tensión palpouse xa dende a primeira pregunta onde o Sr. Alcalde urxía á nosa concelleira a deixar o uso da palabra cando esta amosaba o seu desacordo coa falla de actividades culturais específicas para a mocidade eumesa durante o mes de novembro, o que supón unha continuidade no abandono dos servizos aos xoves pois tamén no verán foron excluídos da oferta municipal (Non houbo campamento municipal, urbano…). Lembramos a ausencia do “Planet” e que os nenos e nenas de máis de 12 anos vagan sábado tras sábado polas rúas eumesas sen ningún tipo de oferta que preveña a aparición do temido botellón.

As Axudas Municipais para Material Escolar, có fin de paliar o custo económico de comezo de curso das familias con renda inferior a 18.000€, atópase na fase de estudo das solicitudes.

Non hai oferta concreta para o Mantemento do colexio de Andrade a partires de Xaneiro.Non van contratar a un interino e non saben como van cubrir a praza, mais pensan cubrila.

Ante a preocupación dende o noso grupo pola recepción apresurada e irresponsable da Xunta dun colexio sen rematar e cheo de problemas, pola falla de resposta inicial do Goberno Municipal e a denuncia da actitude do Concelleiro de Educación que, unha vez máis, en vez de informarse e apoiar aos servizos educativos do seu Concello cando a situación do Couceiro empeorou gravemente días pasados, optou primeiro polo desmentido das declaracións da Directora do Couceiro, para logo pasar a colgarse medallas na prensa insistindo no continuo diálogo, dende entón, coa Xunta, o Sr Crespo utilizou a resposta retrovisor, mira atrás, nada é da súa incumbencia e responde con evasivas e de paso crispando canto pode. Calquera día enfociña de tanto mirar atrás…

Ante a nosa denuncia de que logo de moita visita de técnicos os obreiros seguen sen traballar na rápida e integral solución ás eivas xa denunciadas dende no momento da recepción, o Sr Alcalde comezou a desesperar, xa dicía non saber nin que teitos caeran e ante o nome do Centro de Formación de Profesorado a súa tensión non o deixou pensar e pasou directamente ás descalilficacións á nosa Concelleira que reiteradamente ven denunciando en Pleno e prensa o recorte de servizos en Pontedeume, sendo o CEFORES un deles: Nun colexio novo equipado con instalacións para que continuara o Couceiro sendo sede de aulas para a formación do profesorado e recursos para as escolas da zona, a Xunta optou por non utilizalas e dar este servicio a Pontedeume dende Ferrol. Non caendo na utilización do insulto emprazamos ao Sr Alcalde á lectura das actas dos Plenos correspondentes para comprobar quen minte ou non.

Instámoslle a tomarse o tema en serio e esixir á Xunta unha rápida e integral solución aos problemas do colexio polo primordial interese do ensino eumés e mirando ao futuro tamén polos interesen económicos do Concello debido ao maior ou menor custo do seu mantemento segundo sexa a calidade final das instalacións.

Para o Sr. Crespo o curso debe comezar en decembro pois convoca o 2 do próximo mes o correspondente a principio de curso, ou será o de fin de curso que non puido celebrar? Non será que este ano non houbo razóns de peso para escoitar á Comunidade Escolar representada no CEM?

O nerviosismo foi en aumento e a pregunta sobre a Oferta Pública de Emprego anulada polo Xulgado por ser contraria ao Ordenamento Xurídico ao non ser escoitados os intereses dos traballadores na correspondente Mesa de Negociación subiu a temperatura da sala.

Logo de perdas de tempo e tensións innecesarias o 14 de decembro está convocada a Mesa de Negociación, non apreciamos outro cambio na actitude do Goberno que faga prever a chegada da paz social ao noso Concello. O punto de partida será o mesmo, a oferta de 2008 e non quixeron nin oír falar de consolidación de emprego, promoción interna, tipo de concurso oposición… O Alcalde recortou unha vez máis as intervencións, en especial cada vez que tentaba falar o Concelleiro máis novo da Corporación (situación esta nada novidosa, non sabendo que é o que máis molesta ao Sr. Torrente si o contido das palabras do Sr. Fernández ou a súa xuventude). O Sr. Alcalde botou balóns fora unha vez máis e pretendeu eludir as súas responsabilidades, dicindo sobre a realización da Oferta de Emprego Público: “Fíxose como dixeron os técnicos do Concello”.

Na oitava pregunta se está a facer a recollida selectiva de lixo, pensan que tamén nas illas ecolóxicas.

Non lles constaba o problema de vertidos de augas fecais, comprometéronse a informarse e actuar.

As obras do Plan E que teñen problemas, que son como ben sabedes moitas, están a ser solucionados polas empresas adxudicatarias das mesmas, confiemos en que desta o fagan ben. Nesta pregunta ao serlle denegada a palabra ao noso Concelleiro, este en sinal de protesta abandonou o Pleno.

A 11ª pregunta respostaron que a mesma persoa que o estaba a facer e en principio có mesmo protocolo.

A 12ª non a puideron contestar ao estar a Secretaria de vacacións.

Aínda non teñen data para presentar o proxecto de Orzamento!!!, pero esperan seguir coa boa sintonía acadada no POS.

Sobre o Campo de Fútbol de A Gándara

No Pleno da Deputación Provincial de A Coruña, celebrado o día de hoxe, 26 de Novembro, se aprobou a formalización dun convenio co Concello de Pontedeume para a instalación do terreo de xogo de herba artificial no Campo de Fútbol de A Gándara, cunha aportación do organismo provincial de 340.000 €, correspondendo ó Concello aportar 5.862,07 €, equivalente ó IVA (18%) da cantidade principal.

Os socialistas eumeses queremos amosar o noso agradecemento á Deputación ó ver por fin formalizado no pleno provincial o compromiso adquirido o mes de febreiro polo seu Presidente co noso portavoz e ratificado na súa visita ás instalacións de A Gándara o pasado verano, e felicitar dun modo especial á gran familia do Eume Deportivo que en pouco tempo poderá disfrutar dun terreo de xogo digno da súa categoría e historia, facendo así realidade unha vella reivindicación dos seus directivos, xogadores e afeccionados.

Tras este acordo plenario, se procederá á firma dun Convenio entre o Presidente da Deputación e o Alcalde de Pontedeume, que permitirá iniciar os trámites de licitación das obras, agardando que se axilicen ó máximo para que as novas instalacións se atopen plenamente operativas a vindeira tempada.

Rogos que levamos ao Pleno Ordinario de Novembro

1º.- Diante da celebración no día de hoxe do Día Internacional contra a Violencia de Xénero, o grupo municipal socialista insta ó goberno municipal a:

- Desenvolver actividades coa mocidade encamiñadas á prevención da violencia de xénero, xa existente nas relacións temperás, promovendo as relacións interiguais, o desenvolvemento da autoestima e da identidade sexual, a corresponsabilidade e o respecto, actividades que na actualidade son escasas en Pontedeume, por non dicir inexistentes.

- Promover programas respecíficos de sensibilización contra a violencia de xénero, co fin de contribuir dende o noso Concello a erradicación desta terrible lacra.

- Intensificar e diversificar o traballo dos Servicios Sociais na defensa da liberdade, autonomía e seguridade das mulleres, e na recuperación da dignidade, estabilidade emocional e dereitos plenos das víctimas.

2º.- Reiteramos por enésima vez o arranxo das lousas rotas do Paseo Marítimo.

3º.- Pregamos se arranxe o afundimento do camiño que comunica Castrelo con Vizús na parroquia de Centroña á altura do número 123. Así mesmo pregamos se coloque correctamente no mesmo camiño un cable do alumeado público que colga ata o chan.

4º.- Ante o perigo que representa, pregamos que se arranxe unha farola situada en Caldagueiro que ten o foco colgando.

5º.- Pregamos ao grupo de goberno que reconsidere a ubicación de algúns dos xa tristemente coñecidos bancos que foron instalados nos últimos meses e que están a suscitar tanta polémica e comentarios entre os veciños. Estámonos a referir entre outros ao que se encontra no camiño de baixada á Igrexa de Centroña, encaixado no muro do cemiterio, que pola pendente da zona fai que a súa utilidade sexa discutible, os instalados nas inmediacións do Local da A.V.V. de Andrade que se atopan “mirando” a unha muralla, ou os da Avenida da Coruña inutilizados polos vehículos estacionados.

6º.- Pregamos a limpeza e retirada de carteis da marquesina da ponte, así como a limpeza da fonte e o arranxo das beirarrúas na Praza Rosalía de Castro, que, cando chove, convertese nunha lagoa.

7º.- Pregamos se inste a Portos de Galicia para que sinalice vertical e horizontalmente o noso Porto, a fin de evitar os continuos problemas de tráfico que se veñen producindo.

8º.- Diante da anunciada concesión dunha axuda plurianual por parte da Xunta de Galicia para a elaboración dun plan especial para o casco histórico da nosa Vila, faise referencia na prensa a un diagnóstico encargado polo goberno o pasado ano a un arquitecto local. Queremos lembrar, pregando se teña en conta no seu momento, o alzado de todo o casco histórico –casa por casa- levado a cabo por profesores e alumnos da Escola de Arquitectura de A Coruña, en base a un convenio suscrito hai uns anos entre esta Universidade e o Concello de Pontedeume, un importante traballo de campo que sen dúbida facilitará a elaboración do plan ó equipo redactor e que debera abaratar sensiblemente o custe do mesmo.

9º.- Nun Pleno recente denunciabamos a falla de sensibilidade deste goberno co grupo de teatro ARJÉ do IES Breamo nas pasadas Festas das Peras. Hoxe sabemos que a subvención municipal comprometida para este ano 2010 non se lles vai pagar, pese a adebedarlles tamén a do ano 2009, e que se lles prometeu que se abonarían as dúas no ano 2011 xunto coa correspondente a este exercicio, promesa que é un auténtico “brindis ó sol” xa que de momento nin hai proxecto de orzamento para 2011, nin se sabe a quen corresponderá cumplila nun ano electoral. Pregamos pois ó goberno maior seriedade á hora de cumplir os seus compromisos en materia educativo-cultural, lembrándolles que, como di o refrán, “prometer e non dar ós tontos fai alegrar”.

Preguntas que levamos ao Pleno Ordinario de Novembro

1ª.- Realizouse algunha actividade este mes para a mocidade dende a Concellería de Cultura?.

2ª.- En que momento se atopa a axuda municipal para material escolar, nº de solicitudes, data de concesión,etc.?.

3ª.- Haberá algunha novidade na custodia do CEIP de Andrade no 2º trimestre do curso escolar?.

4ª.- Ante as evidentes eivas do CEIP “Couceiro Freijomil” xa denunciadas no momento da recepción do mesmo e repetidas veces dende esa data pola Dirección do Centro tanto á Admón. Local como Autonómica, que se fixo dende a Concellería de Educación para mellorar as condicións do colexio e que pensan facer a partires de agora?.

5ª.- Para cando o Consello Escolar Municipal de comezo de curso?.

6ª.- Ante os problemas na cuberta do edificio onde está o Centro de Maiores, que medidas vanse tomar para solucionar dunha vez por todas as deficiencias nesta obra tamén denunciadas reiteradamente neste Pleno?.

7ª.- En Marzo de 2008, todos os compoñentes da Oposición Municipal, agás os do COE, presentabamos unha Moción na que entre outros acordos instabamos ao equipo de goberno a retirar a oferta de emprego público debido á nulidade do proceso, constituír a Mesa Xeral de Negociacións e informar do progreso das mesmas. O Goberno desoíu a Moción e condenou ao Emprego Público a tensións e perdas de tempo innecesarias. Logo do contundente fallo do Xulgado, que medidas vai tomar o Goberno e que tempos baralla para a súa realización?.

8ª.- Hai xa tempo que foron instalados na nosa Vila distintos tipos de contedores para a recollida selectiva do lixo. Cal é o funcionamento deste servizo?, realmente estase a facer unha xestión selectiva dos residuos?

9ª.- Ante as denuncias presentadas polos veciños da zona, que medidas se tomaron dende o Goberno Local para rematar cos vertidos de augas fecais que se están a realizar no vial que discorre paralelo entre o Paseo Marítimo e a Rúa Río Eume?

10ª.- Nos últimos días puidemos comprobar a existencia de defectos de construción en varias obras sufragadas con cargo ao Plan Estatal de Investimento Local, comunmente coñecido coma Plan E. Estámonos a referir ao afundimento do “Camiño Real” ou “da Picha” na parroquia de Ombre, ás lousas rotas e desprendidas na Corredoira das Virtudes ou ás xa mentadas goteiras na cuberta da Escola de Música. Que se fixo dende o Grupo de Goberno a este respecto?

11ª.- Hai unhas semanas que se inaugurou o albergue provisional de peregrinos. Quen é a persoa encargada da súa xestión?

12ª.- Meses atrás aprobábase en Sesión Plenaria unha moción presentada polo noso Grupo na que se instaba ao Goberno Local a elaborar un inventario de bens. En que punto se atopa dita elaboración?.

13ª.- Ante a ausencia de noticia algunha dende o goberno municipal ó respecto cando xa está a rematar o ano 2010, e tendo en conta que o vindeiro ano é ano electoral, cando pensan presentar ós grupos municipais o proxecto de Orzamento para o ano 2010?.

Sobre as declaracións do Sr. Crespo sobre os problemas na recollida do lixo

Estes días atrás, puidemos ler na prensa unhas declaracións do Concelleiro de servizos nas que aseguraba que ante a avaría sufrida por un dos camións que se encargan da recollida de lixo, varias parroquias da nosa vila que levan dende o pasado luns sen este servizo seguirán nesta situación mentres non se solucione esta deficiencia, para a continuación responsabilizar deste feito aos Grupos da Oposición por non apoiar a proposta privatizadora presentada polo Goberno Local.

Dicía o Sr. Crespo :
“Ésta es la consecuencia de no privatizar el servicio; ahora nos quedamos sin recogida de basura hasta que no se subsane el problema. Si se hubiese privatizado, la empresa adjudicataria tendría la obligación de poner a nuestra disposición otro vehículo”

En primeiro lugar temos que recordarlle que o Concello tamén ten a obriga de cubrir a baixa dese camión, situación contemplada na Lei, que permite contratar un reforzo do servizo por necesidades do mesmo, tales como a avaría da maquinaria…

En segundo lugar gustaríanos deixar claro que de ningunha maneira a oposición pode ser a responsable da incompetencia manifesta da que ven facendo gala dende o inicio da lexislatura o goberno do PP, como non é responsable de que non se laven os contenedores, de que a “illas ecolóxicas” estean totalmente esnaquizadas e abandonadas, de que non se limpen os restos do botellón, de que se gasten os cartos en cambiar papeleiras sen instalar outras novas naquelas zonas onde non as hai,…

E por último temos que aclarar aos eumeses i eumesas que dende que comezou a lexislatura, hai máis de tres anos, só se nos convocou a unha comisión informativa relacionada con esta problemática. Desgraciadamente con a única intención de presentarnos un informe que o Grupo de Goberno pretendía utilizar para respaldar a súa proposta “externalizadora”, sen estar esta recollida no mesmo. No mencionado informe só se contemplaba como medidas para a mellora da prestación a adquisición dun novo camión e a ampliación do cadro de persoal en dous operarios, sen facer referencia en ningún momento ao déficit recadatorio que arrastra este servizo e que ronda os 300.000€ anuais.  Tendo en conta isto así coma a escasa relevancia das medidas propostas, xa que un novo camión podería ser subvencionado pola Deputación Provincial como xa o foron no seu día os dous existentes, ou a contratación de dous operarios cuio custo poderían asumir perfectamente as arcas municipáis e sabedores ademais de que os empregados públicos que traballan neste servizo non poden ser pasados obrigatoriamente á empresa privada, tería que ser de forma voluntaria, polo que no caso de rexeitar o seu traslado o Concello tería que mantelos no plantel  e seguir pagando o seu soldo, non podemos apoiar unha proposta que ben podería definirse coma unha auténtica chapuza, pouco ambiciosa, nada rigorosa e que non incide de ningunha maneira nas verdadeiras causas do mal funcionamento do servizo de limpeza e recollida de lixo.

Na mesma sesión plenaria na que se rexeitaba esta proposta ofreciamos a nosa colaboración ao Grupo de Goberno para, entre todos, atopar unha solución a este problema, a día de hoxe e pasados máis de tres anos seguimos á espera.  Ante estes feitos e porque non se están a cubrir a baixas do persoal, nin a sacar a concurso a tan necesaria praza de “capataz de vías e obras”, nin a realizar a recollida de lixo en parroquias de forma periódica, porque se está a contratar a empresas privadas certos traballos de forma “fraudulenta”, tal e como o describe a intervención municipal; queda claro, por unha banda, a falta total de vontade do Goberno do Sr. Torrente por dar  solución ao principal problema que aqueixa á nosa vila, e por outra a súa férrea intención de privatizar este servizo para favorecer a intereses privados.

O Grupo Municpal Socialista solidarízase coa Comunidade Educativa do “Couceiro Freijomil”

A rápida recepción pola actual Xunta de Galicia da obra do novo Couceiro, con eivas na cuberta, pistas sen aillar, patios sen rematar, peches sen completar etc., máis a deixadeza do Concello que aínda non lle colocou os tobogáns, cabaliños…,non puxo o chan do patio de Infantíl, que deixou de limpar os patios estando toda a semana pasada chea de cristais e outros restos do botellón a zona superior, non podendo utilizarse o patio cuberto nos días que tanto chovía, levan a unha marcha académica chea de incidencias alleas ao profesorado e ao alumnado pero que non fan máis que entorpecer a actividade do centro.

Dende o noso grupo pregamos, cuestionamos e esiximos reiteradamente ao Goberno Municipal que afronte as súas obrigas co colexio e que xestione ante a Admón. Autonómica a rápida solución dos problemas que non fan mais que aumentar, no aínda non inaugurado centro: Curtocircuítos que estragan material informático e eléctrico(Pantallas , CDs, ordenadores….), Inundacións en diferentes areas (Biblioteca, Ximnasio,corredores, Infantil, CEFORES…), Patio dos pequenos anegado ás veces e sempre insuficiente…

Agora non podemos máis que seguir loitando ante a Administración Autonómica por unha pronta solución aos problemas estructurais do edificio e por un mantemento, limpeza e custodia axeitados da Admón. Local e apoiar as xustas reivindicacións do ANPA, Dirección e Consello Escolar do colexio.

O Goberno Eumés non ten tempo para sacar a concurso a atención de só 21 dependentes, mentres a maioría, coa xestión en trámite pode perder as axudas.

Cando están a piques de cumprirse 4 anos da aprobación da denominada “Lei de Dependencia”, no Concello de Pontedeume logo de o Goberno presidido polo Sr. Torrente optar pola externalización do servizo (Setembro 2008) vai para dous anos que a atención aos dependentes está con unha prórroga ilegal dun contrato menor de 18.000€ que garantía o servizo só ata decembro de 2008.

Esta irregular e ilegal forma de contratación é habitual neste goberno na recollida de enseres, a xestión do pavillón e do Centro de Maiores, o mantemento de alumeado público…Pero estamos a falar de xente impedida, enferma, maior…, dependente.

O Goberno Local desoe ao seu departamento de Intervención que pon continuos reparos aos pagos fraccionados cando se debe formalizar un contrato de modo legal evitándose incorrer en fraccionamentos ilegais. E fai oídos xordos tamén as continuas esixencias do noso partido de aprobar en Pleno o pertinente prego que faga posible sacar a concurso a atención aos dependentes dun xeito regulamentario, atendendo á legalidade vixente. Chegando a dicir o Sr. Alcalde que non é por falta de tempo… Dous anos sen tempo para legalizar a atención aos dependentes eumeses??!!

A esta desidia e ilegalidade engádese a falta de xestión política da Concelleira, Sra. Carballeira, que síntese satisfeita con que haxa 21 dependentes atendidos na actualidade de un total de 235 solicitudes , con 76 PIA realizados, segundo recoñece a Xunta de Galicia (Datos SIGAD sobre Dependencia por Concellos 28/07/2010).

Máis que sentirse satisfeita, a Sra. Concelleira debera poñerse as pilas esixíndolle ao Sr Alcalde traballo rápido e eficaz no que depende da administración local e xestionando ante a Xunta de Galicia un incremento de valoracións que fagan posible que máis eumeses e eumesas poidan beneficiarse da atención baixo a Lei de Dependencia e non queden como “Dependentes en trámite”.A Conselleira de Traballo e Benestar Social declaraba recentemente que quedarán sen axudas os dependentes en trámite.

O drama de las persoas dependentes e das familias que os coidan é de tal magnitude que debera ser prioritario para o Sr. Alcalde. O “estar ocupados en outras cousas” indica unha falta de sensibilidade, ademais de ser moi mala desculpa e unha Concelleira de Servizos Sociais ten que estar loitando por cada caso e non escudarse en un posible acelere que acadou a …21 dependentes!!!.

Dende o Grupo Municipal Socialista no Concello de Pontedeume queremos denunciar o mal funcionamento do servizo de mantemento do alumeado público, así coma a negativa por parte do Goberno Municipal de sacar a concurso a concesión do mesmo.

Hai un mes que se aprobaba no Pleno da Corporación a Conta Xeral correspondente ao ano 2009. Unha vez máis tal e como ven acontecendo dende hai tres anos, neste documento facíase constar por parte da Intervención Municipal o carácter irregular e ilegal da contratación de empresas sen ningún tipo de concurso público para o mantemento do alumeado público, a recollida de enseres ou a xestión do Pavillón Municipal e o Centro de Maiores…

Como é sabido esta situación foi denunciada en numerosas ocasións polo noso Grupo, instando ao Concelleiro responsable da área a rematar con esta práctica con a que se está a beneficiar a empresas vinculadas ao  Partido Popular ás que mes tras mes, e pese aos numerosos reparos emitidos polos servizos técnicos do Concello, se lle abonan “relixiosamente” as facturas presentadas.

Nesta ocasión ocuparémonos do servizo de mantemento do alumeado público, o cal ademais de encontrarse nunha “situación irregular”, está a ser deficitario no que á súa prestación se refire, xerando numerosas críticas entre os cidadáns das que damos conta a continuación.

Nos “Castros”, na parroquia de Andrade, hai meses que o alumeado funciona de forma aleatoria, acendendo só dúas de cada catro lámpadas, en idéntica situación se atopan os veciños de Centroña, así coma os de outras parroquias nas que hai un gran número de puntos de luz fundos. O Paseo Marítimo ou a Ponte de Pedra, cuia iluminación artística está case “desaparecida”, son outros exemplos que retratan sen ningún tipo de dúbida cal é a realidade deste servizo.

Por todo o exposto anteriormente reclamamos ao Goberno Municipal que remate con a situación de privilexio na que se atopa esta empresa, sacando a concurso a concesión do mantemento do alumeado público, tal e como establece a lei. Esiximos ao mesmo tempo que o Concello cumpra con a obriga de garantir un servizo de calidade a todos os veciños e veciñas de Pontedeume.

Comentarios ao pasado Pleno de Outubro

Comezou  esta sesión ordinaria coa aprobación de actas para pasar a aprobación das modificacións das ordenanzas dos servizos externalizados de sumidoiros , auga e piscina para subir nas taxas aos usuarios e usuarias  o IPC para o ano que ven. Era a única achega do goberno ao Pleno e aprobouse pois obriga o contrato coas empresas e de no subirllo aos que se benefician do uso destes servizos habería que prexudicar a todos os contribuíntes sobre os que recaería a suba.

Entre o 11 e o 21 de outubro entregáronse no rexistro do Concello 4 mocións, dúas do BNG e dúas nosas. Ningunha constaba na orde do día e o Goberno non achegou copia aos  Concelleiros, e  Concelleiras ata o día anterior ao Pleno. Houbo que votar a urxencia que o P.P. en pleno non votou, e pasar logo á súa presentación, debate e aprobación. O Sr. Alcalde persiste no uso dun dos seus filtros antidemocráticos.

A primeira presentada foi a primeira que debateu e como o BNG coincidía coa nosa preocupación polo abandono por parte da Xunta da finanzación do “Noitebus” aceptamos a do Bloque pola súa similitude cos nosa  e estar presentada antes:

O Sr, Núñez Feijoo considera que “este é un servizo que resulta innecesario nun  momento de dificultades económicas”. O Presidente da Xunta segue coa súa folla  de ruta de dar tixeretazos ás políticas de benestar social, neste caso estamos a falar de mocidade e de seguridade viaria . O Sr. Núñez pretende suprimir un servizo que ten evitado todas as fins de semana traxedias nas estradas galegas.

Na Moción que o Goberno Municipal ten que trasladar á Xunta de Galicia aprobámola votos en contra do P.P. e do C.O.E. O Goberno Municipal sempre obediente aos dictados do seu partido e o COE segue có seu apoio e achegamento tan esaxerado  ao PP que calquera diría que conflúen nas mesmas filas, o tempo o dirá… O ex número 1 do COE segue desaparecido…, en combate?

O acordo foi o seguinte:

“Instar á Xunta a manter o funcionamento do servizo de transporte público nocturno a lugares de lecer (Noitebus), sen aplicar ningunha reducción das rutas existentes e mellorando a súa dotación e funcionamento no conxunto do territorio galego”

A Moción de Sanidade foi aprobada cos votos en contra do P.P. e a abstención do C.O.E. Alegou a Sra. De Vicente, voceira do Círculo de Opinión Eumés que non tivera tempo a lela, lembrando que nos foran entregadas o día anterior e iso que a data de rexistro era do 11 de outubro.

Logo pasamos a discutir a nosa Moción sobre Educación. Aprobouse, esta vez solo cos 4 votos en contra do Goberno Municipal, que actuaron unha vez máis como ovellas mansas do Sr. Feijoo en vez de como Concelleiros , Concelleira e Alcalde dos eumeses e eumesas. Instamos ao Concelleiro de Educación, Sr. Crespo, a que, non se despegara da realidade educativa de Pontedeume e a que  tramitara persoalmente ante a Xunta os acordos. Que tentara mellorar a situación actual ou a lo menos presionara, apoiándose na Moción, para que este recorte de servizos educativos non se repitan na nosa vila nos próximos cursos.

Os acordos son os seguintes:

1.       Dotar dos servizos físicos e humanos necesarios para que o 1º ciclo da Educación Infantil aumente a súa oferta cos parámetros de calidade e cantidade que merece o noso Concello.

2.       Adoptar as medidas precisas para dotar do profesorado suficiente aos centros do noso Concello, tendo en conta as necesidades educativas e non economicistas como as que se veñen de aplicar.

E a continuación pasamos a Rogos e Preguntas (Colgados na nosa Web).

En xeral foi un Pleno de moito debate e difícil de resumir. Cada vez máis as políticas do Goberno se extreman, mostrando ademais da lentitude e ineficacia a que nos ten afeitos a súa faciana máis conservadora có abandono das políticas sociais e a pouca transparencia nas outras areas, que levan a  desconfiar de posibles clientelismos e partidismos.Isto fai que as súas respostas acendan o debate pois,  cando as hai son :evasivas, confusas, incompletas e ás veces buscan directamente a ofensa, para evadir as súas responsabilidades.

Non son quen de facer unha boa xestión pero ademais e que non saben defendela nun Pleno. Explícase o pouco peso político que teñen coas outras Administracións ante as que non defenden con eficacia os intereses dos eumeses e eumesas.

Centrándonos nas preguntas, que xa poidéchedes ver neste mesmo blogue:

1. Na actualidade non se está a realizar ningunha actividade por parte do Concello nos Institutos, pero o Sr Crespo encheu o tempo de resposta lendo o que se fixo e o que pensa facer. Tarde Sr. Concelleiro de Educación, o reforzo non pode esperar nin xustificarse con tres meses e a Comunicación Oral , o mesmo, có agravante que esta curso grazas aos recortes de Educación en Pontedeume hai menos profesorado para Inglés… Que será o plurilingüísmo para o P.P.,só  tirar ao lixo libros en galego e mercalos en castelán? En Pontedeume, si.

2. O Planet non comezará ata decembro. A Concelleira, Sra. Carballeira, dixo que non pensaba que parara no Nadal, sen moita seguridade, esperamos que a colla. A planificación serán actividades variadas que dependen un pouco da oferta da empresa que as leve. Lembrámoslle as pintadas do Palco da Música da Alameda, feitas polos nosos fillos e fillas promovidas polo Concello nun Planet anterior. Non se pode improvisar nin aventurarse en actividades ser ter valoradose acadarán os seus obxectivos.

3.

a) “Seguen traballando” para sacar a concurso a Atención aos Dependentes, respostou a Sra. Carballeira. Cando lle botamos en cara a ilegalidade en que están e o gran atraso o Sr. Alcalde retrucou que están ocupados en outras cousas…

b) A resposta foi sorprendente:Nada se fixo para mellorar pois vai moi ben este ano, xa están atendidos 21 dependentes.As últimas estatísticas que achegou a Xunta, despois de moitos esforzos, son do 28 de xullo. Nelas consta que hai 235 solicitudes de Pontedeume, e certo que con 21 libranzas dentro dun total de  54 atendidos por outros modos.Pero ante as declaracións da Conselleira nunha entrevista do Pais “Los dependientes en trámite se quedarán fuera de ayudas” o Concello non xestiona nada para procurar axudas. Claro que o Alcalde non o cree porque ven no País, segundo dixo no Pleno. Esperemos que a Concelleira, que non coñecía estes datos, si  se responsabilice de xestionar atención para estas persoas.

c) Despois de moito insistir agora parece que para o ano vai solicitar cursos para formar profesionais que podan traballar na atención aos dependentes, dixo a Concelleira de S. Sociais.Claro que tamén dixo que este ano non puido ser pois estaba o Centro de Formación Eumés completo…

4.      Non se dispón de axuda para a rehabilitación do Mercado Municipal.Vaise realizar o proxecto do Mercado Provisional e non hai novidade na xestión sobre o derrubo da agraria.

5.      Comunicouse por 2ª vez á empresa constructora, se non o fai rápido executárase á conta do aval.

6.      O Sr. Otero di que o Goberno non entregou mandos, cando lle xustificamos a pregunta dicíndolle que varios veciños viron a un comerciante usándoo, voltaron dá política da criminalización, que o denuncien.

7.      Xa se “reubicaron” varios colectores de lixo e que continuarán. Nos comprendemos que haxa que cambiar de lugar dentro da mesma zona, pero non compartimos o cambio de zona como “reubicación”: Non se pode obrigar aos veciños dos Rosales a saír da súa urbanización para tirar o lixo e dicir que isto é “reubicar”: Iso é dificultar a limpeza da zona, a reciclaxe e a vida das persoas que alí viven.

8.      As fontes están sen clorar, non teñen tratamento. Por iso a Xunta obriga a poñer os carteis.

9.      A Alameda deixará de ser aparcadoiro e volverá a pertencer ao lecer dos peóns.”Cando rematen as obras das rúas”. Antes era cando remataran as obras da rúa San Agustín, agora xa obras en  calquera rúa vale para xustificar o mal uso da Alameda.

10. O Sr. Alcalde bastante incómodo pola pregunta declarou que si, que dende o principio están abertos e están traballando a nivel técnico e político para poderse acoller ás medidas de acompañamento.