Pontedeume sen campamentos de verán municipais

O pasado Maio interesabámonos en Pleno polos Campamentos Municipais, contestaban  dende o Goberno Municipal do Partido Popular que aínda non podían informar de nada, nin do lugar, agrupamentos, datas, tipos de xestión…

Onte no Pleno correspondente ao mes de Xuño, volvemos a interesarnos pola organización desta actividade que se lle ofertaba aos  eumeses e eumesas dende os anteriores gobernos, con xestión directa dos técnicos de Servizos Sociais, aos que coñecían e confiaban os seus fillos e fillas que organizaban campamentos  cada ano dende  1991  de gran prestixio e demanda na contorna. Para os pequenos curtos e próximos e para os mozos e mozas de ata 16 anos máis longos en tempo e desprazamentos,  incluso fora  da nosa Comunidade Autónoma (Toledo, León, Burgos… ) o que era máis atractivo e  enchía tódolos anos esta actividade.

A resposta foi tan desilusiónante, para os que apostamos por unha oferta pública, rica e variada cara o tempo de lecer da infancia e mocidade como ilustrativa da lenta e ineficaz xestión do Goberno do Sr Torrente: Optarán por non realizar os Campamentos de Verán pois as empresas as que lle ofertaron a súa realización a estas alturas xa teñen o verán ocupado ou simplemente a estas alturas aínda non contestaron.

Hai tres anos que dende a Concellería de Servizos Sociais se optou pola privatización deste servizo e os resultados non poden ser máis decepcionantes :

No verán do 2008 tiveron que suspender o Campamento Urbano.
No 2009 a improvisación levou a suspender os Municipais.
Agora a falta de planificación, a desidia e a tardanza obrigan a suspender os por 2º ano consecutivo os Campamentos Municipais.

E isto nun verán de pobre oferta cultural municipal. Segundo informou o Concelleiro responsable no Pleno de onte consta unicamente de tres cursos para adultos e aquilo que oferte a Deputación. Dende a Concellería de Educación só se ofertan 30 prazas para as actividades de conciliación da vida familiar e laboral para a totalidade da poboación eumesa de menos de 12 anos. Esperemos que polo menos non chova e á mocidade e infancia eumesas  lles quede a praia…

Dende o Grupo Socialista denunciamos unha vez máis o abandono das políticas sociais do goberno actual. As areas educativa, cultural e social son as irmás pobres do Goberno do Sr. Torrente, coa súa xestión está levándoas a un paulatino empobrecemento e á  redución   da oferta pública

Rogos que levamos ao Pleno de Xuño

1.- Resulta sorprendente o frecuente recurso á deslocalización deste goberno municipal e do seu Concelleiro de Educación. Se o ano pasado o Consello Escolar Municipal de comezo de curso celebrábase no mes de Decembro, este ano o Consello de remate de curso celebrarase no mes de Setembro, seguindo claramente a tendencia a retrasar tres meses a data natural de celebración, pois como todos xa sabemos nada supón un simple trimestre no inmenso océano educativo no que están inmersos os nosos rapaces.

Pregamos respecto ós órganos consultivos e á axenda establecida, que, como no Consello Escolar Municipal, non é fruto da improvisación, se non un mecanismo necesario para o coñecemento e planificación das necesidades educativas no noso Concello.

2.- Pregamos que por quen corresponda, propietarios ou Concello, se proceda a rozar a maleza que invade o tramo final das beirarrúas da estrada da Estación.

3.- Xa entrados en época estival, e funcionando o aparcamento de vehículos no Porto, pregamos se prohiba o estacionamento de vehículos na Alameda, procedendo ó seu peche, e se instale en Sopazos a ducha que foi retirada o pasado mes de Abril.

4.- Diante do caos circulatorio derivado das obras na Corredoira das Virtudes e na Rúa San Agustín, pregamos se informe, vixile e sinalicen debidamente as vías alternativas ou cambios de dirección existentes, facilitando así a circulación de vehículos na zona.

5.- Con motivo das obras de ampliación e reposición que se están a levar a cabo na Rúa Galera, o acceso das persoas quedou limitado a unha franxa de un metro de ancho escaso. Pregamos se proceda a rozar e limpar a maleza que crece ó longo da parte baixa do muro do xardín, que invade e limita ese xa de por sí escaso acceso.

A Deputación da Coruña destinará 340.000 euros para dotar de herba artificial o campo de fútbol da Gándara, en Pontedeume

O presidente da Deputación da Coruña, Salvador Fernández Moreda, visitou esta tarde o campo de fútbol da Gándara, en Pontedeume, no que a institución provincial investirá 340.000 euros para dotar o terreo de xogo de herba artificial.

Fernández Moreda foi recibido á súa chegada ao campo polo presidente do club Eume Deportivo, Manuel Costas Vázquez, e polos concelleiros socialistas, Agustín Vilariño e Bernardo Fernández, cos que percorreu as instalacións, e saudou os rapaces que xogan nas diferentes categorías do equipo.

O presidente provincial destacou que as obras permitirán substituír o actual campo de xogo por un moderno terreo de céspede sintético que lles permitirá aos máis novos do municipio adestrar e xogar ao fútbol en mellores condicións, e afirmou que a provincia coruñesa “é a mellor dotada en infraestruturas deportivas”, pois a Deputación está a implantar un ambicioso programa de dotación de terreos de herba artificial en máis de 68 municipios da provincia, cun orzamento global duns 30 millóns de euros.

Pola súa banda, o presidente do Eume Deportivo, Manuel Costas, agradeceu o compromiso da institución provincial para mellorar o campo de fútbol, o que permitirá un uso máis intensivo deste.

Descrición do proxecto:
As obras consistirán na instalación dun terreo de xogo de herba artificial no campo de fútbol municipal de Pontedeume, cunhas dimensións de 95 X 62 m, banda lonxitudinal de 1,50 m., banda transversal (fondos porterías) de 2,50 m., o que fai unha superficie total de 5.890 metros cadrados.

Tamén se instalará a rede de drenaxe ca colocación dunha canaleta de formigón dun metro de lonxitude, colectores de PVC de diámetro 160 mmm. cas correspondentes arquetas e un colector de 200 mm. que irá situado ao longo do fondo do campo de fútbol.

O rego será automático con depósito acumulador de 20.000 litros, 2 bombas e programador de 6 estacións. Proxéctase un sistema de rego con 6 canóns.

O céspede será de última xeración para a práctica de fútbol 11 e 7 fabricado en fibra, con fio de polietileno de 55 mm. de alto, e o campo estará debidamente limitado polas liñas de xogo.

Esta actuación inclúe unha varanda de aluminio perimetral, xogo de porterías para fútbol 11 e 7, e bandeiríns.

Fonte: Deputacion de A Coruña

Alternativas do PP á crise

Preguntas que levamos ao Plen Ordinario de Xuño

1ª.- Diante da Moción do noso grupo sobre solidariedade municipal aprobada no Pleno do pasado mes de abril, fíxose algunha xestión para que dita moción fose efectiva? Poderá aplicarse xa este verán?

2ª.-Teñen xa habilitada a ubicación definitiva do Servizo de Normalización Lingüística? Cal será? Por que razóns?

3ª.- Por que dende o Concello non se facilitou o uso da pista de baloncesto do “Couceiro Freijomil” ao Trofeo de Minibasquet feminino Vila de Pontedeume que organizou en datas recentes o Pontumio?

4ª.- Con que persoal se fai na actualidade a custodia e mantemento do CEIP de Andrade? Que continuidade vai ter?

5ª.- Ante a redución da canle do Covés polos depósitos xurdidos por mor das últimas choivas, chegando a ter en zonas illotes de area, que medidas se tomaron para evitar futuras inundacións ante as crecidas do río? Teñen algún proxecto concreto para rehabilitar o lavadoiro que de atopa, no Fondal de Esteiro, na marxe dereita deste río?

6ª.- Poden informar sobre os Campamentos Municipais de Verán? E sobre a oferta cultural para este verán?

7ª.- Xa hai dous meses que dende o noso Grupo denunciabamos os problemas do abastecemento de auga que veñen sufrindo dende hai máis de un ano os veciños do número 1 da Rúa Cabanas; polo que sabemos a día de hoxe continúan na mesma situación. Que xestións fixeron neste último mes para atopar unha solución definitiva?

8ª.- Aprobabamos no mes de Marzo unha moción na que se instaba ao Concello a iniciar os trámites para a elaboración do Inventario de bens e dereitos de titularidade municipal. En que punto se atopa dita elaboración?

9ª.-Tendo en conta o considerable retraso que acumula a area de urbanismo no que á concesión de licencias se refire, o que está a xerar o malestar dun importante número de veciños, cando pensan cubrir a baixa da arquitecta municipal?

10ª.- Estanse a realizar obras sufragadas con cargo ás “baixas” do Plan Provincial de Obras e Servizos (POS)?, De ser así, de que actuacións se trata?

11ª.- Hai máis de dous anos que se anunciaba dende o Grupo de Goberno a “inminente elaboración” da ordenanza municipal de ocupación de vía pública, cal é o motivo polo que a día de hoxe aínda non contemos con este regulamento?

12ª.- En que tramo do camiño se atopa a anunciada construción do albergue provisional de peregrinos nos Almacéns de Raxoi?.

Dende o grupo municipal socialista pedímoslle ó Goberno municipal que presente un novo orzamento municipal

Pasados catro meses dende que o Pleno da Corporación Municipal de Pontedeume rexeitase os orzamentos para o exercicio 2010 presentados polo grupo de goberno, que só contou co apoio dos catro concelleiros do PP, o Grupo Municipal do PSdeG-PSOE esíxelle ó goberno municipal, e en particular ó Concelleiro de Facenda que para iso cobra un soldo, que presente xa un novo documento económico que sexa obxecto de debate plenario, e que deixen de agocharse e escudarse en que non se lles aprobou o Orzamento para ocultar e disimular a súa ineficacia, a total ausencia de iniciativas, o incumprimento de compromisos adquiridos e o manifesto abandono dos servizos públicos.

Dende o grupo municipal socialista pedímoslle ó goberno municipal que presente un presuposto con cifras de ingresos cribles, axustadas ás previsións reais de recadación, e, polo mesmo, non infladas, que nos expliquen en que políticas de gasto van a concretar a austeridade tan necesaria e reclamada ás administración públicas, e que nos indiquen que programas de gasto van a priorizar e cales van a recortar ou suprimir.

Coa responsabilidade que nos corresponde como primeiro grupo da oposición, e tendo transcorrida a metade do exercicio, facemos un chamamento ó goberno municipal do PP para que asuma as súas obrigacións, pois corren malos tempos para deixar á improvisación, á espontaneidade e á arbitrariedade a xestión dos escasos recursos públicos de todos os eumeses.

O Concello de Pontedeume discrimina, unha vez máis, o servizo de normalización lingüística municipal.

O Partido Popular, nos tres anos que leva gobernando no Concello de Pontedeume, tivo unha estrana relación co idioma:

• O  Voceiro do Goberno, o Sr Otero, incumpre sistematicamente a Ordenanza de Normalización Lingüística, non tendo intención de cambiala pero tampouco de respectala. Coas graves consecuencias que esto supón, sendo ademais el, o Concelleiro de Cultura.
• O cartel informativo que puxeron, por 2ª vez, na entrada da Vila está polos dous lados en castelán, sendo denunciado este feito dende a oposición. Logo de caer por mor dun accidente de tráfico, vimos como a pesares do compromiso do Concelleiro de Obras , Sr Crespo, ante a nosa petición de que se utilizaran tanto o galego como o castelán, volvérono poñer en castelán polas dúas caras.
• A páxina web do Concello da mostras, outra vez, da diglosia enfermiza que sofre o Goberno do Partido Popular mesturando informacións só  en galego con outras só en castelán, sendo imposible optar por unha ou outra lingua como é usual nas páxinas doutros Concellos. Ademais da falla de actualidade e escaseza informativa que denunciamos reiteradamente, vemos como despois de máis dun ano de andaina os nomes dos monumentos seguen castelanizados e a súa información e exclusivamente en castelán, a información do Pleno esta en castelán e non se actualiza, etc.
• No último Pleno denunciabamos eivas na nova organización dos espazos na Casa Consistorial. Vendo, entre outras cousas, como o Servizo de Normalización Lingüística seguía no “exilio”  forzoso sen volver ao seu espazo natural onde coidamos que é tan necesario.

Hoxe temos que denunciar que o Sr Alcalde pretende converter a ubicación provisional por obras  deste departamento, pola que xa foron multados pola Inspección de Traballo, en ubicación definitiva. Optando por deixar ao S. N. L. lonxe da Casa Consistorial  onde, có resto da Administración Local, estivo dende que foi creado, posto que é un servizo adscrito á Area de Administración Xeral, imprescindible tanto para velar polo bo uso como pola promoción da lingua galega dende o Administración Local.

Non é so que non lle dean contido real senón que ademais o queren ver ben lonxe…

O Grupo Municipal Socialista no Concello de Pontedeume mostra o seu asombro ante as declaracións do Concelleiro de Obras e Servizos, Javier Crespo.

Hoxe puidemos ler no diario “La Opinión” unhas declaracións do Concelleiro responsable da área de Obras e Servizos, nas que aseguraba que ante a denuncia feita polo noso Grupo na sesión plenaria do pasado mes de Maio con respecto á licitación pública dos servizos de recollida de enseres e mantemento do alumeado, se defendera de estas acusacións “explicando a los presentes que la redacción de los pliegos de condiciones es un trabajo complejo en un municipio “del tamaño de Pontedeume”, por lo que los técnicos municipales “no se atreven” a realizar esta tarea, razón por la que se ha solicitado a la Xunta una persona para que se encargue del desarrollo de los pliegos”.

En primeiro lugar temos que aclarar que tales declaracións non se produciron en ningún momento, xa que a denuncia foi feita polo noso Grupo no capítulo de Rogos, polo que non existe a posibilidade de réplica por parte dos membros do Goberno.

Deixando a un lado este “pequeno detalle” tan significativo, temos que recordar que, tal e como se pode comprobar nas actas das Sesións Plenarias, en todas as ocasións nas que tanto o noso Grupo coma o resto que conforman a oposición preguntamos por este tema obtivemos a mesma resposta por parte do Goberno, argumentando que esta situación irregular se debía á falla de tempo da Secretaría Municipal causada pola carga de traballo que estaba a xerar o Plan E, o Plan de Obras e Servizos Provincial ou o PXOM, dependendo da época na que se formulase a pregunta; pero en ningún momento se referiron á “falla de capacidade” do persoal municipal, que por outra banda sempre realizou esta tarefa de forma exemplar.

Non entendemos a complexidade técnica que pode comportar a elaboración duns “pliegos de condicións” para a saída a concurso da recollida de enseres, ou dito de outra forma, a recollida de mobles vellos con un camión; ou o mantemento do alumeado público. Creemos máis ven que isto se debe a nula capacidade política e de xestión do Concelleiro responsable deste área así coma ao seu interese por seguir prorrogando a situación de privilexio na que se atopan as súas “empresas amigas”.

Denunciamos, unha vez máis, o mal funcionamento do servizo de recollida do lixo

Xa non é a primeira vez que dende o PSdeG-PSOE mostramos o noso malestar ante a deficitaria prestación dun servizo básico por parte do Goberno presidido por Gabriel Torrente, pero o da limpeza, e concretamente a recollida de lixo  é o que ocupou máis titulares dende que o PP chegara á Alcaldía hai xa tres anos.

As razóns son moitas e variadas, xa sexa por tratarse dunha problemática que afecta a todos os veciños de Pontedeume, vivan en parroquias ou no casco, por influír negativamente na imaxe da nosa vila ou por ter sido a principal promesa electoral dos “populares” nas pasadas eleccións municipais. O caso é que transcorrido todo este tempo e despois de numerosos anuncios da posta en marcha de medidas meramente propagandísticas que en nada melloraron a súa prestación así coma a malograda e pouco ambiciosa privatización que só contemplaba a adquisición dun novo camión e o aumento do plantel en dous empregados, os Eumeses seguen a sufrir as consecuencias da nefasta xestión da Concellería de Servizos a este respecto, demostrando cada día que pasa a súa incapacidade para atopar unha solución definitiva que remate con esta situación.

Hoxe mesmo puidemos comprobar que algunhas zonas do noso termo municipal levan sen recollida de lixo dende o pasado fin de semana, como é o caso das inmediacións do campo da Gándara, no que os contedores aínda non foron baleirados así coma en numerosos puntos en parroquias. Mais grave é a situación da Rúa Gumersindo Placer, na parte traseira das “Lonxas de Raxoi”, onde os restos do “botellón” do fin de semana seguen  polo chan ofrecendo unha pésima imaxe da nosa vila cando está a piques de comezar a tempada estival.