O Grupo Municipal do PSdeG-PSOE denuncia a ausencia do Concello de Pontedeume na relación de axudas que a Deputación da Coruña ven de otorgar o pasado 10 de xuño dentro do Programa “Limpeza de praias anualidade 2009”.
Na lista de concellos destinatarios destas axudas, que foron convocadas no BOP de 1 de Abril de 2009, aparece o veciño Concello de Cabanas, cunha axuda concedida de 22.400 €, o de Ares, con 28.000 €, Cedeira, con 11.107,56 €, Ortigueira con 30.000 €, e moitos máis concellos costeiros da provincia.
O motivo da ausencia de Pontedeume, está en que o goberno municipal non solicitou esa axuda, que é compatible con calqueira outra que poida conceder a Xunta de Galicia ou outra administración para similar actividade.
Estamos ante un exemplo máis da deixadez e falla de iniciativa e interese do noso goberno municipal, que tamén foi denunciado pola ex-concelleira Ruth García no seu escrito de renuncia, e que xa tivo outra manifestación o pasado ano, cando Pontedeume perdeu unha subvención de 14.600 € outorgada pola Xunta de Galicia para realizar actividades para os nenos da Vila nos centros educativos fora do horario escolar, porque o goberno non foi capaz de xestionala e programar as actividades ás que ía destiñada.
Agardamos que desta nova mostra de ineptitude non culpen, unha vez máis, ós grupos da oposición.
