Respostas ás nosas cuestións no pasado Pleno de Marzo

O Pleno deste xoves, 26 de marzo tivo como tema central a privatización do Servicio de Limpeza, podedes acceder á esta  información neste mesmo blogue, en Pontedeumeonline, en “La Opinión”,… “La Voz”.

Imos informar doutros temas, de carácter educativo e social, que tamén se trataron e que dende o noso partido parécennos vitais.

E outra vez máis puidemos constatar o desinterese do Sr. Crespo sobre a area educativa da que é responsable, e a improvisación e escasa planificación da Sra. García dentro dos temas sociais que na actualidade deberían ocupar todo o seu tempo, logo de que o Sr. Alcalde cesáraa nas súas responsabilidades na area educativa “para conquerir unha maior celeridade e eficacia na xestión municipal”.

Presentamos, dous días antes, as seguintes preguntas, e as respostas, a pesares da anticipación das preguntas foron como acostuman, baleiras de contido á par que sorprendentes.

- Por que o Concello non está a impartir actividades fora do horario escolar nos Centros Públicos?

A esta pregunta o Concelleiro de Educación non contestou. Limitouse a explicar que está facendo os trámites para inicialas proximamente, non dixo cando, como, nin que tipo de actividades.

Recordámoslle que o ano comeza en xaneiro, que xa levamos un trimestre sen actividades municipais para os nenos e nenas nos centros públicos fora do horario escolar, que o ano pasado se lles concederan máis de  14.000€ que perderan pois, como nada fixeran, non tiñan facturas con que xustificar a axuda da Xunta, que cede os espazos e cofinanza as actividades. Se é que pensaban que non nos ían dar a subvención este ano debido ao seu desprezo pola do ano 2008, pero nada explicou porque non fai estas actividades que lle saírían gratis e axudarían a moitas familias eumesas. (Poderíanse incrementar as actividades extraescolares e os servizos educativos complementarios para o alumnado de Infantil, Primaria e secundaria obrigatoria dun xeito totalmente gratuíto para as familias)

- Cal é o motivo de que non saia a concurso a xestión de actividades deportivas municipais, unha vez que Galilandia rematou o contrato?

A esta pregunta respostounos o Concelleiro de Facenda, á maneira do PP “Estamos trabajando en ello”, tamén en outras privatizacións seudolegais como a dos enseres , a do mantenimento eléctrico,…  Quitarannas a concurso, como din sempre, proximamente. A Sra.García confirmou que o Concello está dando actividades deportivas a través dunha empresa que non ten contrato dende novembro.

- Por que se nega información ao Pleno que logo se lle da á prensa ou á páxina das NNGG do PP, sen informar antes aos lexítimos representantes do pobo?

Aquí non sabían a que tema en concreto nos estabamos a referir, hai tantos!, aclarámoslles que no último pleno se nos negara a información sobre o tipo de actividades que tiñan planificadas para o “Planet Club”, que aos poucos días tíñanas colgadas na páxina de NN.GG. e publicitadas en prensa e que non tiveran a educación democrática de informar aos representantes do pobo que nos interesaramos polo tema.

Respostóusenos que 10 días antes de iniciarse o Planet con actividades para mozos e mozas de 12 a 18 anos, a concelleira non sabía que se ía facer!. Deixando clara a súa gran capacidade de improvisación. Replicámoslle dicindo que nos parecía cando menos perigoso, sobre todo pensando que se empeza cunha actividade como o “graffiti”, onde se non está ben planificada podemos acadar resultados non desexados, e que desde logo estamos en total desacordo con que se incite a pintar en edificios públicos, como está a pasar, pois están pintando no Palco da Música da Alameda co beneplácito do Concello (Ata os seus compañeiros a interrogaban para confirmar se era certo aquilo que eu estaba a expoñer). E a Sra. Concelleira confirmou que era certo, e que a súa idade moi diferente á da nosa Concelleira, Sra. Cascallar, lle daba unha óptica diferente e compartía totalmente o que estaba a suceder. Pois moi ben. (Xa sabemos a gran capacidade deste Goberno para a limpeza de todo tipo, en particular a de edificios públicos.)

- Que medidas efectivas  tomaron dende o Goberno Municipal para que a igualdade de oportunidades das mulleres e homes sexa un dereito non soamente legal senón tamén real?

A esta foi como a primeira, a calada por resposta. Dixemos que ademais de actos puntuais en días “marcados”, as frases como a da pregunta (É do 1ª Plan de Igualdade de Oportunidades entre Homes e Mulleres do Concello de Pontedeume) deben ir acompañados dun traballo diario con Programas de Intervención, Prevención, Coeducación e Formación, Programas que estivo a ofertar a Xunta de Galicia e que en 2 anos non quixeron, non souberon ou simplemente non tiveron interese en levar a cabo no noso Concello. A Sra. García  dixo que dende o Goberno se estaban tomando as medidas necesarias e se garantía a Igualdade.

————————————————————————–

Para máis información deste Pleno ou calquera consulta ou suxerencia que nos queirades facer chegar, accedede á sección CONTACTA, onde a través dun formulario podedes facernolas chegar.