Hoxe entra en vigor a reforma do Imposto de sucesións que elimina a tributación da vivenda habitual e das empresas familiares

Como xa informamos neste blogue a reforma do Imposto de Sucesións e Doazóns beneficiará significativamente aos pequenos e medianos patrimonios familiares posto que se basea nun tratamento moi favorable para dous dos elementos con maior presenza nos patrimonios da maioría das familias galegas: a vivenda habitual e a propiedade de empresas familiares. A nova normativa permite que o 90% das herdanzas galegas queden exentas de tributación, o que sitúa a Galicia nunha posición competitiva respecto do seu entorno, ao situarse na banda baixa dos países europeos no referente a este tributo. Ademais, permite dispoñer dun imposto máis xusto e equitativo, acorde cos cambios sociais e que responde aos desafíos en materia de competencia fiscal doutras comunidades autónomas.

As características fundamentais da Lei aprobada polo Parlamento de Galicia, son a eliminación da tributación da vivenda habitual para o cónxuxe e a redución para os fillos; favorece de xeito significativo aos pequenos e medianos patrimonios; supón a práctica eliminación do tributo para as pemes, empresas familiares e as explotacións agrarias; e a substancial redución das tarifas e os tramos para simplificar o tributo e adaptalos aos cambios do sistema fiscal. Neste sentido, neutralízanse os efectos da competencia fiscal entre comunidades autónomas e incentívase o emprendemento.

Descarga a Lei aquí